Eg er fødd i 1978, og kjem frå Granvin i Hardanger, der eg voks opp på ein fruktgard like ved Granvinsvatnet. 

No bur eg i Lommedalen i Bærum saman med ektemann Thomas, tvillinggutar på 6 år, og to bonusbarn.

Eg debuterte med diktsamlinga Store stygge dikt i 2005. I 2011 kom romanen Mellom oss og to år seinare diktsamlinga Urd. Denne boka vann Brageprisen 2013 i klassen for skjønnlitteratur og fekk også Bokbloggarprisen i open klasse. Året etter kom den biografiske diktsamlinga Manilahallen, og i 2016 kom Sigd

Sigd vann Nynorsk litteraturpris – og kjem snart ut på engelsk, nederlandsk og spansk. Neste år kjem den ut på fransk.

I tillegg har det blitt fire bøker for små barn, om søskenparet Mari og Magnus, og to barnediktsamlingar illustrert av Mari Kanstad Johnsen: «Eg er eg er eg er» og «Skogen den grøne».

Våren 2018 debuterte eg som dramatikar med stykket «Cally» på Det Norske Teatret og hausten 2018 kom den første thrilleren: «Alt er mitt». Å samarbeide med musikarar og kunstnarar er blant det eg likar aller best å gjere som forfattar – og eg har tidlegare turnert med to poesikonsertar, Urd (saman med Rannveig Djønne og Tuva Syvertsen) og Sigd (saman med Benedicte Maurseth) . Eg har også stor glede av å samarbeide med kunstnarane på Bærums verk der eg leiger kontor.
Frå 2001 til 2007 var eg informasjonsansvarleg i Det Norske Samlaget, før arbeidsplassen dei neste åtte åra var kommunikasjons-avdelinga i Samferdselsdepartementet.

Sidan juni 2015 har eg vore forfattar og frilansar på heiltid.

Winje Agency ved Gina Winje representerer meg i utlandet – og kan kontaktast på: gina.winje@gmail.com / 918 41 150

Forfattarfoto: Agnete Brun